पुस १०, काठमाडौँ । आज देशभर प्रकृति पुजारी किराँत समुदायको दोस्रो महत्त्वपूर्ण चाड उधौली हर्षोल्लासका साथ मनाइँदै छ । मङ्सिर पूर्णिमाका दिनदेखि हरेक वर्ष सुरु हुने उधौली चाड जीवजन्तु, मानिस तथा चराचुरुङ्गी लेकतिरबाट बेँसीतिर बसाइँ सर्ने समय भएको सङ्केत गर्न तथा अन्नबाली भित्र्याइएको खुशियालीमा मनाउने गरिन्छ ।

उधौली किराँत राईहरुको दोस्रो महान् चाड हो । यस चाडमा अन्नबाली भित्र्याउनुअघि प्रकृति र पितृको पूजा गर्ने चलन छ । यस दिन किराँतीहरु एकापसमा भेला भएर सङ्गठितरुपमा चाड मनाउने र शुभकामना आदनप्रदान गर्ने गर्दछन् । 

किराँतहरुको धार्मिक पुस्तक मुन्धुमअनुसार समयलाई दुई भागमा बाँडिएको छ । यी हुन उधौली र उभौली । किराँत समुदायको बुझाइ अनुसार खेतीकिसानीका आधारमा यी दुई समय बाँडिएको हो ।

किराँत समुदायका मूलतः सुनुवार, राई, लिम्बू र याख्खाहरूले उधौली पर्व परम्परागत वेशभूषा लगाई सार्वजनिक स्थलमा भेला भएर सामूहिक रूपमा साकेला नृत्य गर्दै विविध कार्यक्रम आयोजना गरि मनाउने गर्दछन् । 

• न्युज बहार संवाददाता