भदौ २०, काठमाडौँ । आज देशभर वैदिक सनातन धर्मावलम्बीले ‘श्रीकृष्णजन्माष्टमी’ पर्व भगवान् श्रीकृष्णको पूजा–आराधना गरी श्रद्धा–भक्तिपूर्वक मनाउँदैछन् ।
कर्मयोग, ज्ञानयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्रि’ भन्ने प्रचलन रहेको छ ।
यस दिन देशभरिका कृष्णमन्दिरमा भगवान् श्रीकृष्णको प्रवचन, पूजा–आराधना, भजनकीर्तन गर्नाका साथै विशेष गरी महिला, पुरुष ‘व्रत’ बसी रातभर जाग्राम बस्ने प्रचलन छ ।
पाटनको मङ्गलबजारस्थित प्रसिद्ध कृष्ण मन्दिरमा यस अवसरमा आज ठूलो मेला लाग्दछ । यसैगरी आज राजधानीको उत्तरपूर्वी भेगस्थित कागेश्वरी मनोहरा नगरपालिकामा रहेको नवतनधाममा पनि भक्तजनको भीड लाग्ने गर्दछ । उत्तरी भेगस्थित बूढानीलकण्ठमा रहेको श्रीकृष्ण भावनामृत सङ्घको कार्यालयमा रहेको कृष्ण मन्दिरमा पनि भक्तजनको भीड लाग्छ । त्यस्तै राजधानीका विभिन्न स्थानमा रहेका ठूला, साना श्रीकृष्ण मन्दिरमा पनि भक्तजनको भीड लाग्ने गरेको छ ।
सरकारले श्रीकृष्णजन्माष्टमी पर्वका अवसरमा आज देशभर सार्वजनिक बिदा दिएको छ ।
- न्युज बहार संवाददाता
