असार २, ललितपुर । ललिरतपुरका किसानलाई पहिले जस्तै यस वर्ष पनि रासायनिक मलको चिन्ताल पिरोलेको छ। रासायनिक मलको अभावको कारण खेतीपातीको समय नजिकिँदै गर्दा यहाँका किसानले बर्सेनि सास्ती खेप्नुपरेको छ ।
ललितपुर महानगरका किसानहरु मकैमा मल राख्नुपर्ने र धानको बीउका लागि ब्याड राख्नुपर्ने समयमा आवश्यक मल नपाउँदा चिन्तामा छन् ।
कृषि सामग्री कम्पनीलाई रासायनिक मल खरिद गरी स्थानीय तहमा वितरण गर्नुपर्ने जिम्मा छ तर साल्ट ट्रेडिङ र कृषि सामग्री कम्पनीले पर्याप्त मल वितरण गर्न नसक्दा किसानलाई बर्सेनि खेतिपातीको समयमा मलको चिन्ताले सताउने गर्छ।
चालु आर्थिक वर्षमा कृषि सामग्री कम्पनीबाट महानगरले एक हजार तीन सय ६० बोरा युरिया मल र छ सय बोरा डिएपी मल प्राप्त गरेको ललितपुर महानगरपालिकाको कृषि शाखा प्रमुख सावित्रादेवी पण्डितले जानकारी दिएकी छिन।
त्यसैगरी महानगरले साल्ड ट्रेडिङमार्फत एक हजार पाँच सय ४० बोरा युरिया मल र तीन सय बोरा डिएपी मल प्राप्त गरेको छ ।सावित्रादेवी पण्डित भन्छिन ‘अन्य समस्याभन्दा मलको समस्या लिएर किसान कार्यालयमा आउनुहुन्छ, माथिबाटै अनुदानमा मल कम आएपछि हामीसँग अर्को उपाय छैन।’
- न्युज बहार संवाददाता
