फागुन २१, काठमाडौँ। ८ इन्टरनेट सेवा प्रदायक कम्पनीहरूलाई नेपाल दूरसञ्चार प्राधिकरणले कारबाही गरेको छ।प्राधिकरणले ग्राहकहरूलाई स्वीकृतिबिना नै सेवा प्रदान गरिरहेको भन्दै यी कम्पनीहरूलाई कारबाही गरेको हो।प्राधिकरणको कारबाहीमा भायानेट कम्युनिकेसन लिमिटेड, सुबिसु केबलनेट लिमिटेड, वेबसर्फर डिसमिडिया नेटवर्क लिमिटेड, नेपाल कम्युनिकेसन सिस्टम प्रालि, वर्ल्डलिंक कम्युनिकेसन्स लिमिटेड, क्लासिक टेक प्रालि, र वाईफाई नेपाल प्रालि र सिजी कम्युनिकेसन लिमिटेड गरी ८ इन्टरनेट सेवा प्रदायक कम्पनीहरू परेका हुन्।
प्राधिकरणबाट महशुलदर स्वीकृत नगराई कुनै पनि इन्टरनेट सेवा प्रदायकले सेवा दिन मिल्दैन। यो ऐन विपरित हुन्छ। प्राधिकरणले यसै विषयलाई केन्द्रित गर्दै पटक-पटक इन्टरनेट प्रदायकहरूका लागि पत्रचार समेत गरेको थियो।
प्राधिकरणका
प्रवक्ता सन्तोष पौडेलले भने ‘उनीहरूलाई पटक-पटक विभिन्न माध्यमबाट अराजक कार्य
नगर्न र ऐन विपरित कार्य नगर्न चेतावनी दिँदै आएको थियो, यस सम्बन्धमा स्पष्टीकरण
समेत माग गरियो, स्पष्टीकरण चित्तबुझ्दो नभएपछि यी कम्पनीहरूलाई कारबाही गरिएको हो।
- न्युज बहार संवाददाता
