मंसिर २४, काठमाडौँ । आज बेलुकी अर्थात प्रत्येक वर्ष मार्गशीर्षकृष्ण त्रयोदशीका दिन साँझ दिवङ्गत पितृका नाममा महादीपदान र चतुर्दशीका दिन बिहान शतबीज छरी मनाइने बालाचतुर्दशी पर्व सुरु हुँदैछ । देशभरका शिवालयहरु लगायत पशुपतिनाथ मन्दिरमा आज राति अर्थात् बालाचतुर्दशीको अघिल्लो रात दिवङ्गत पितृका नाममा महादीपदान बालेर त्यसदिपलाई त्यो रातभरी निभ्न नदिई कुरेर बस्ने चलन रहेको छ । पशुपति क्षेत्र विकास कोषले पशुपतिनाथमा बालाचतुर्दशीका अवसरमा दीप प्रज्ज्वलनदेखि मुख्य क्षेत्रमा शतबीज छर्ने सम्पुर्ण व्यवस्था मिलाएको जानकारी दिएको छ ।
बालाचतुर्दशी पर्व मनाउन देशका विभिन्न स्थानबाट भक्तजन पशुपतिमा आउने गरेको कोषका कार्यकारी निर्देशक घनश्याम खतिवडाले बताए ।
खतिवडाका अनुसार मृतकका आफन्तजनले मार्गशीर्ष कृष्ण त्रयोदशीका दिन रातभर महादीप बाली भजनकीर्तन र लोकझाँकी प्रस्तुत गरी रात बिताउने गर्ने परम्परा रहेको छ । मृतक परिवारभित्र सदस्यले दिवङ्ग आत्माको चिरशान्तिको कामना गर्दै १०८ शिवलिङ्ग, सूर्यघाट, कैलाश, गुह्येश्वरी, गौरीघाट, आर्यघाट, मृगस्थली, पशुपति, किरातेश्वर र विश्वरूप आदि ठाउँमा शतबीज छर्ने गरेका छन ।
- न्युज बहार संवाददाता
