चैत ५, काठमाडौँ । प्रधानमन्त्री पुष्पकमल दाहाल ‘प्रचण्ड’ एक कार्यक्रममा छमछमी नाचेका छन । उनलाई नचाउन गायक प्रकाश सपुतको गलबन्दी गाइएको थियो ।  गायक प्रकाश सपुतले आफ्नो चर्चित गीत ‘गलबन्दी’मा प्रधानमन्त्री पुष्पकमल दाहाल ‘प्रचण्ड’लाई छमछमी नचाएका हुन ।

पोखरा सहरलाई औपचारिक रुपमा पर्यटकीय राजधानी घोषणा गर्न आयोजित भएको समारोहमा सपुतको गीतमा गण्डकी प्रदेशका मुख्यमन्त्री, पूर्वगृहमन्त्री र पोखराका मेयर सहित प्रचण्ड पनि मज्जाले नाचेका थिए ।

गायक सपुतले पञ्जैबाजाकै अर्को ट्रयाकमा पनि उपस्थितलाई  मज्जाले नचाएका थिए । गायक सपुतले प्रचण्डलाई अब्बल क्रान्ति नायक भन्दै उनीसामु आफूले पहिलो सांगीतिक प्रस्तुति रहेको बताएका थिए ।

प्रधानमन्त्री प्रचण्डसहितका अतिथि सबै उठेर मंचमा सपुतले ‘गलबन्दी’ गीत गाउन सुरु गर्दा नाच्न तयार भएका थिए । समारोहमा अर्का गायक धर्मेन्द्र सेवानले अर्को चर्चित गीत ‘रेशम फिलिली’ गाएर मनोरञ्जन दिएका थिए । कार्यकक्रममा गायक प्रमोद खरेलले पनि सांगीतिक प्रस्तुति दिएका थिए ।

• न्युज बहार संवाददाता