असोज २, काठमाडौँ । प्रकाश सपुत र परीक्षा लिम्बु मुख्य भूमिकामा रहेको फिल्म ‘सोल्टिनी’को टिजर सार्वजनिक गरिएको छ। तिहारको भाइटीका (६ कात्तिक) मा प्रदर्शनमा आउने तयारीमा रहेको यो फिल्मको टिजरमा अन्तर्जातीय प्रेम, सामाजिक यथार्थ र चुनौतीहरूलाई उजागर गरिएको छ।

टिजरमार्फत फिल्मको कथा, मुख्य द्वन्द्व र पात्रहरूको प्रस्तुति झल्काइएको छ। पूर्वी नेपालको राई समुदायको सामाजिक परिवेशमा आधारित फिल्मले जातीय विविधता र अन्तर्जातीय प्रेमलाई मुख्य विषयवस्तु बनाएको छ।

अर्जुन सुवेदीको निर्देशनमा तयार भएको फिल्ममा प्रकाश सपुत र परीक्षा लिम्बुसँगै विल्सन विक्रम राई, विक्रम राई, सब्बु गुरुङ, रविन्द्र झा, प्रकाश घिमिरे, प्रेम सुब्बा, कविता आले, सुन्दर धिताल र सुजन खतिवडाको अभिनय रहेको छ।

फिल्मको छायांकन इलाम बजार, बिब्ल्याँटे, कन्याम, बिर्तामोड, पथरी र भोजपुरका आकर्षक स्थानहरूमा गरिएको हो।

निर्देशक सुवेदीका अनुसार फिल्मले समाजमा अझै कायम रहेको जातीय विभेद र असमानताविरुद्धको सन्देश दिन्छ। दुई पात्रबीचको प्रेमकथा नै फिल्मको मूल केन्द्रबिन्दु हुनेछ।

• न्युज बहार संवाददाता