माघ ८, स्याङ्जा । यस वर्ष स्याङ्जा जिल्लाको भिर कोट नगरपालिका–७ मा रु ११ करोड बढीको सुन्तला बिक्री भएको छ । स्याङ्जाका जिमिरे, तिलाहार, धोबादी, बल माटा, लोलुङ्गा, पासिन्डाँडा, पाङसाङ, कोलडाँडा, चिउरीखर्कलगायतका गाउँबाट सुन्तला उत्पादनका लागि परिचित रहेको छ । 

आफ्नो वडामा यसवर्ष सुन्तला   बिक्रीबाट रु ११ करोड बढी भित्रिएको भिरकोट –७ का वडाध्यक्ष एवं सुन्तला सुपरजोन स्याङ्जाका सञ्चालक समिति अध्यक्ष ताराप्रसाद अर्यालले बताएका छन ।

अध्यक्ष अर्यालका अनुसार तिहारका बेलादेखि सुन्तला बजार पठाउन सुरु गरेर माघको दोस्रो सातासम्म सबै बिक्री गरिसकिने छ भने सुरुमा प्रतिकेजी रु ४० मा बिक्री गरेको सुन्तला अन्तिममा आइपुग्दा प्रतिकेजी रु ७० का दरले बिक्री भएको छ ।

उनले भने “यहाँ उत्पादन भएका सुन्तला किसान आफैँले बिक्री गर्ने, बगैँचा नै ठेक्का दिने वा तौलेर अन्यत्र पठाउने गरिन्छ, विशेषगरी यहाँका सुन्तला पोखरा, काठमाडौँ, बुटवल, नारायणगढ जस्ता सहरमा जाने गरेको छ ।”

स्याङ्जा जिल्लाको भिर कोट नगरपालिका–७ मा  कोदोखेती गर्दै आएका बारीमा अहिले सुन्तलाका बोट देख्न सकिन्छ । यहाँका स्थानीयका अनुसार सुन्तलाखेतीबाट आम्दानी लिन सकिने भएपछि सुन्तलाखेतीतर्फ आकर्षित हुँदै गएका हुन । 

• न्युज बहार संवाददाता