भदौ ३१, घोराही । दाङ जिल्लामा पछिल्लो समय केराखेती गर्ने किसानको सङ्ख्या बृद्धी हुँदै गएको छ । केराखेतीका लागि दाङ जिल्लाको देउखुरी क्षेत्रमा माटोसँगै सिँचाइको सुविधा भएको र थोरै खेतीबाट राम्रो आम्दानी हुने हुनालेले व्यावसायिक केराखेती गर्नेको सङ्ख्या बृद्धी हुँदै गएको हो ।

दाङ जिल्ला राप्ती गाउँपालिका–७ सिसहनिया निवासी विद्याबहादुर चौधरीले पनि विगत चार वर्षदेखि केराखेती गर्दै आइरहेका छन् । उनले सुरुमा तीन बिघा जग्गा भाडामा लिएर व्यावसायिक केराखेती सुरु गरेका हुन । यसै केरा खेतीबाट उनले अहिले वार्षिक १३–१४ लाख बराबरको केरा बिक्री गर्दै आएका छन ।

किसान चौधरीका अनुसार उनले केराखेतीबाट राम्रो आम्दानी लिँदै आएका छन भने अन्य कृषि व्यवसायको तुलनामा केराखेतीले राम्रै आम्दानी दिने गरेको छ । यस खेतीमा धेरै मेहनत पनि गर्नु पर्ने हुँदैन ।

किसान चौधरीले भने ‘अन्य कृषिबालीजस्तो जोखिम नहुने र परिवारसँग घरमा बसेर राम्रो आम्दानी गर्न सकिने भएकाले केराखेतीबाट सन्तुष्ट छौँ।’ उनका अनुसार उनी आगामी दिनमा खेतीलाई बढाउँदै लैजाने तयारीमा रहेका छन ।

उनले उत्पादन गरेको केरा बिक्रीमा समस्या नरहेको र  अहिलेसम्म उत्पादन भएको केरा व्यवसायीले बारीबाटै लग्ने गरेका उनी बताउँछन ।

• न्युज बहार संवाददाता