भदौ ३१, बेनी । म्याग्दी जिल्लाको रघुगङ्गा गाउँपालिका–८ मङ्गलेखानीको परम्परागत मकै र कोदोखेती हुने बारीमा नरप्रसाद छन्त्यालले व्यवसायीक सिमीखेती सुरु गरेका छन्। उनले परम्परागत खाद्य बाली लगाउँदा निर्वाहमुखी खेती मात्र हुने भएपछि आलु र सिमीको नगदे बालीको व्यावसायिक खेती गर्न थालेको बताएका छन । करिब १५ रोपनी बारीमा लगाएको आलु भित्र्याइसकेपछि उनले अहिले सिमी लगाएका हुन् ।

यहाँ बसोबास गर्ने २१ घरधुरीले नै परम्परागतरूपमा खाद्यबालीलाई छाडेर आलु र घ्यूसिमीको व्यावसायिक खेती सुरु गरेका छन । स्थानीयवासीका अनुसार चिसो हावापानी भएकाले खाद्यबाली पाक्नसमेत समय लाग्ने र नगद आम्दानी नहुने देखिएपछी आयआर्जनका लागि व्यावसायिक आलु र सिमीखेती विस्तार गरेका हुन ।

कुइनेमङ्गलेलाई रघुगङ्गा गाउँपालिका र जिल्ला कृषि ज्ञान केन्द्रले समेत आलु र सिमी पकेट क्षेत्र घोषणा गरेका छन् । श्रीकृष्ण कृषि तथा पशुपालन कृषक समूहका सचिव बदेवी छन्त्यालले यस गाउँको करिब एक हजार दुई सय रोपनीमा अहिले सिमीखेती गरिएको जानकारी दिएका छन । अहिले आलुखेती गरेको सबै बारीमा सिमी लगाइएको उनी बतउँछन । उनले आलु नखन्दै त्यही बारिमा सिमी लगाउने र आलु फलिसकेपछि आलु झिक्ने तथा सिमी गोड्ने काम एकैपटक गर्ने गरी आलु र सिमीलाई व्यावसायिकरूपमा विस्तार गरिएको बताउँछन ।

• न्युज बहार संवाददाता