जेठ २६, काठमाडौँ। केही दिनयता देखापरेको सुक्खा खडेरीका कारण त्रियुगा नगरपालिका क्षेत्रमा लगाएका मकैका बोट मर्न थालेपछि किसान चिन्तित बनेका भएका छन।
त्रियुगा नगरपालिका क्षेत्रका पोर्ताह, खैराहा, विसनपुर, लक्ष्मीपुर, मोथ्याई, जोगिदह, भुल्के, खैजनपुर र मोतिगडासहितका क्षेत्रमा रहेका खेतका मकैका बोट मर्न थालेपछि आफूहरु चिन्तित बनेको सम्बन्धित क्षेत्रका किसानहरुले गुनासो गरेका छन।
खैराहाका किसान विष्णु कार्की भन्छन्, ‘आफ्नो भएको झन्डै एक बिघा जग्गा सबै खेतमा यसपटक मकैबाली लगाएको हुँ, जेठको दोस्रो हप्तादेखि राम्ररी मकैको सुत्ला लाग्न थालेको थियो, तर सुक्खा र खडेरी लागेपछि अहिले पात मर्न थाले, मकैको बोट पात सुकेर सिक्रिक्क परिसकेका छन्, यसपटकको मकैबाली खान नपाइने भयो।’
त्यसैगरी पोर्ताहका किसान देवीलाल चौधरीको पनि गुनासो उस्तै छ। चौधरी भन्छन्, ‘आफ्नो खेतमा लगाएको मकैबाली सुरुमा राम्रो थियो, तर जेठको पहिला हप्तादेखि नै खडेरी पर्न थाल्यो, झनै दिनदिनै सुक्खा खडेरी लाग्न थालेपछि मकैको बोट मर्न थाल्यो, अहिले खेतको अधिकांश मकैका बोटमध्ये ५० प्रतिशत बोट त सुकी नै सके।’
यी त प्रतिनिधी किसान मात्र हुन यस क्षेत्रका सबै भर्खर सुत्ला लाग्दै गरेको मकैको बोट धमाधम सुक्न थालेका छन र सबै किसान आफुले लगाएको मकै भित्राउन नपाइने पिरलोले चिन्तित बन्न पुगेको छन्।
- न्युज बहार संवाददाता
