मंसिर२२ , मुस्ताङ । यस वर्ष मुस्ताङबाट रु
४९ करोडभन्दा बढी मूल्यको स्याउ निकासी भएको छ । यस वर्ष उत्पादन भएको ९० प्रतिशत
स्याउ बजारमा निकासी भइसकेको प्रधानमन्त्री कृषि आधुनिकीकरण परियोजनाको
मुस्ताङस्थित स्याउ जोन कार्यालयले जनाएको छ । मुस्ताङबाट निकासी हुने प्रमुख कृषि
उपज स्याउ हो ।
जिल्लाभर
चार हजार नौ सय ७५ मेट्रिक टन स्याउ उत्पादन भएकोमा चार हजार चार सय ७७ दशमलव पाँच
मेट्रिक टन स्याउ देशका विभिन्न ठाउँमा निकासी भएको स्याउ जोन मुस्ताङका प्रमुख
नेत्रप्रसाद भट्टले बताए ।
भट्टका
अनुसार मुस्ताङमा फलेको मध्ये ९० प्रतिशत स्याउ बजारमा निकासी भइसकेको
छ, करिब पाँच सय मेट्रिक टन स्याउ बेमौसममा बिक्री गर्न चिस्यान
गृहमा राखिएको छ ।
स्याउ जोन
कार्यालयका अनुसार कृषकले बिक्री गरेको सरदर प्रतिकिलो रु एक सय १० का दरले हिसाब
गर्दा रु ४९ करोड २५ लाख २५ हजार मूल्य बराबरको स्याउ निकासी भएको छ
।
- न्युज बहार संवाददाता
