पुस २४, म्याग्दी । परम्परागतरूपमा खाद्य बाली लगाउँदै आएका बेनी नगरपालिका–४ सिङ्गा ठूलोखोलाका ३६ घरधुरीले यस वर्ष हिउँदयाममा नगदे बालीका रूपमा व्यावसायिक आलुखेती गरेका छन् ।

एक सय रोपनी बढी खेतबारीमा आलु लगाएको र अहिले आलु गोडमेल गरिरहेको ठूलोखोला महिला कृषक समूहका अध्यक्ष जुना खत्रीले बताईन । उनका अनुसार आगामी माघमा आलु खनेर बजार पठाउने तयारी भइरहेको र बोट राम्रो भएकाले फल पनि राम्रो हुने आशा गरेका गरिएको छ ।  अहिले सिङ्गाको फुर्केसल्ला, डाँडाखेत, राक्सेलगायतका बस्तीमा हिउँदे आलुको व्यावसायिक खेती गरिएको छ ।

चालु आर्थिक वर्ष २०८०-०८१ मा जिल्लामा खेती गरिने प्रमुख बालीमध्येमा पर्ने आलुखेतीबाट जिल्लालाई आत्मनिर्भर बनाउन जिल्लामा आठ सय रोपनी बढीमा हिउँदे आलुखेती गरिएको छ । खायन आलु उत्पादन प्रवर्द्धन कार्यक्रममार्फत हिउँदे आलुमा आत्मनिर्भर बनाउने तयारी कृषि ज्ञान केन्द्र म्याग्दीले समुदायस्तरमा प्रविधियुक्त कृषि उत्पादन प्रवर्द्धन आयोजनाले गरेको हो ।

ठूलोखोकी अगुवा किसान मैना खड्काले विगतका वर्षहरूमा गहुँ, जौँलगायतका खाद्य बाली लगाउने भए पनि यस वर्ष खायन आलु प्रवर्द्धन कार्यक्रमले किसानलाई अनुदान दिएपछि आलुखेतीलाई व्यावसायिकरूपमा लगाएको बताए । कृषि ज्ञान केन्द्रका प्रमख सञ्जीव बाँस्तोलाका अनुसार हिउँदमा आलुको आयात घटाउने र आत्मनिर्भर गराउने लक्ष्यअनुसार खायन आलु उत्पादन प्रवर्द्धन कार्यक्रम सञ्चालन गरिएको हो भने यस वर्ष हिउँदे आलुको खेती विस्तार गर्न २० वटा समूह र एक सहकारी खायन आलुको अनुदानका लागि छनोट भएका छन ।

जिल्लामा थप एक हजार रोपनीमा बर्खे आलुखेती विस्तार यस कार्यक्रमअन्तर्गत हुने बताइएको छ । आलुको संरक्षण तथा विस्तार र व्यावसायिकताका लागि गण्डकी प्रदेशको कृषि तथा सहकारी मन्त्रालयले म्याग्दी जिल्लामा चालु आर्थिक वर्षमा रु तीन करोड बजेट विनियोजन गरेको थियो । कार्यालयले उक्त बजेटबाट कार्यालयले कार्यक्रममा समावेश हुनआएका किसान समूह र सहकारीलाई आलुको बीउ र उपकरण खरिदमा प्रतिरोपनीमा रु १० हजारका दरले अनुदान दिएको जाकारी दिएको छ । 

कार्यालयका अनुसार कार्यालयबाट खायन आलु प्रवर्द्धन कार्यक्रमअन्तर्गत हिउँदे आलुमा मङ्गला, बेनी नगरपालिका, मालिका र धवलागिरि गाउँपालिकाका किसानले अनुदान पाएका छन् भने बर्खे आलुमा अन्नपूर्ण र रघुगङ्गा गाउँपालिका समेत समेटिएको छ ।

जिल्लामा हाल उत्पादन हुने आलुमा स्थानीय सेतो, कार्डिनल,रातो जातको आलु, निलो, र एमएस ४२ रहेका छन । 

• न्युज बहार संवाददाता