असोज १४,
झापा । झापा जिल्ला गौरादह नगरपालिका–५ मा रहेको नमूना एकीकृत सहकारी खेती
बीउ उत्पादन समूहमा आबद्ध महिलाहरुले पापड, अचार लगायत छवटा नमूना उद्योग सञ्चालन गरिरहेका
छन् ।
स्थानीय क्षेत्रमा उत्पादित सामग्रीलाई अन्तर्राष्ट्रिय बजारमा पुर्याउने र आफूपनि स्वरोजगार बन्ने उद्देश्यले उद्योग सञ्चालन गरेको सहकारीमा आबद्ध महिलाहरुले बताएका छन् । छवटा नमूना उद्योग मध्ये अहिले आचार उद्योग भने राम्रैसँग फस्टाएको छ । महिलाले आचार बिक्रीबाट मात्र वार्षिक रु छ लाख बढी आम्दानी गर्दै आएका छन् ।
नमूना आचार उद्योगकी अध्यक्ष सकुन्तला प्याकुरेलले चार वर्षअघिदेखि सहकारीमा आबद्ध सेयर सदस्यले उत्पादन गरेका अग्र्यानिक कृषिजन्य वस्तु कागती, आँप, गाँजर, तामा, जलपाई र चारपाटे, अकबरे खुसार्नीलगायत विभिन्न प्रकारका आचार उत्पादन गर्दै आएको बताए । इलाम, पाँचथरबाट अकबरे खुर्सानी खरिद गरेर ल्याउने गरेको उनले बताए ।
उनले पर्यटकलाई दैनिकजसो मुलुकका विभिन्न स्थानका सङ्घसंस्थाबाट भ्रमणमा आउन थालेपछि यस क्षेत्रको कोसेली हुने र आम्दानीको स्रोत पनि बन्ने देखेर नमूना अचार उद्योग सञ्चालन गरेको बताएकी छन ।
रु १८ हजार लगानीबाट सुरुमा छजना महिला मिलेर सुरु गरेको आचार उद्योगको हाल आफ्नै भवनसहित सुविधासम्पन्न अचार बनाउने औजार र ल्याबसहित रु ३५ लाख बराबरको सम्पत्ति रहेको छ । अहिले आचार बिक्रीमार्फत वार्षिक रु छ लाख आम्दानी हुने गरेको छ ।
