असोज
२, काठमाडौँ । यूएईमा भइरहेको एसिया कप टी-२० क्रिकेट प्रतियोगिताको समूह ‘ए’
बाट
भारत र पाकिस्तानले सुपर-४ चरणमा स्थान सुरक्षित गरेका छन्।
बुधबार पाकिस्तानले यूएईलाई ४१ रनले
हराउँदै सुपर-४ मा प्रवेश गरेको हो।
तर,
खेलअघि
पाकिस्तानले खेल बहिष्कार गर्ने चेतावनी दिएपछि माहोल अन्योलपूर्ण बनेको थियो।
अन्ततः पाकिस्तानले खेल्ने निर्णय गरे पनि उनीहरू साढे ४ बजे दुबई रंगशालामा
जानुपर्ने समयमा होटलबाट ननिस्किएपछि खेलको भविष्यमा शंका देखा परेको थियो।
यूएईका खेलाडीहरू भने निर्धारित समयमा
नै रंगशालामा पुगेका थिए। पाकिस्तानले खेल बहिष्कार गर्ने सम्भावना देखिएपछि यूएई
टोली पनि अन्योलमा परे।
यसबीच पाकिस्तान
क्रिकेट बोर्ड (पीसीबी) का अध्यक्ष मोहसिन नक्वी, जो
एसियाली क्रिकेट परिषद्का पनि अध्यक्ष हुन्,
दुई
पूर्व अध्यक्ष रमिज राजा र नजम सेठीसँग पाकिस्तानमा बैठकमा व्यस्त थिए।
खेल
सुरु एक घण्टा ढिला हुने घोषणा गरिएको थियो,
जसअनुसार
टस साँझ ७ बजे र खेल ७:३० बजे सुरु हुने तालिका बनाइएको थियो।
विवादको मुख्य कारण जिम्बाव्वेका म्याच
रेफ्री एन्डी पाइक्रफ्ट थिए। भारतसँगको गत आइतबारको खेलमा उनले पाकिस्तानी कप्तान
सलमान आलीसँग हात नमिलाउने निर्देशन दिएपछि विवाद बढेको थियो।
पाकिस्तानले कारबाही
नहुँदासम्म यूएईविरुद्ध नखेल्ने निर्णय लिएको थियो। तर विवादित रेफ्री पाइक्रफ्ट ५
बजे रंगशालामा उपस्थित थिए। पाकिस्तान क्रिकेट बोर्ड (पीसीबी) ले उनलाई हटाउन
खोजेको भए पनि अन्तर्राष्ट्रिय क्रिकेट परिषद् (आईसीसी) तयार थिएन।
