बैशाख १, काठमाडौँ । आज वर्ष १०८१ को पहिलो दिन । नयाँ वर्षको अवसरमा नेपालीहरूले एक आपसमा शुभकामना आदानप्रदान तथा घुमफिर गरेर मनाइरहेका छन् । तर आज टाढाको यात्रा तय गरेकाहरूलाई भने मौसमले चुनौती दिने देखिएको छ । किनकी मौसम पूर्वानुमान महाशाखाका अनुसार हाल नेपालमा पश्चिमी वायु र स्थानीय वायुको आंशिक प्रभाव रहेको जनाएको छ । यसको प्रभावले अहिले बिहानको समयमा कोशी प्रदेश, बागमती प्रदेश र मधेस प्रदेश लगायत देशको पहाडी भूभागमा आंशिक बदली रही बाँकी भूभागमा मौसम मुख्यतया सफा रहेको महाशाखाले जनाएको छ ।
त्यसैगरी आज दिउँसो देशको पहाडी भूभाग लगायत सुदूरपश्चिम प्रदेशमा आंशिकदेखि साधरणतया बदली रही बाँकी भूभागमा आंशिक बदली देखी मौसम सफा रहने छ भने कोशी प्रदेश लगायत देशका पहाडी भूभागको थोरै स्थानहरूमा चट्याङ्ग सहित हल्का वर्षाको सम्भावना पनि रहेको छ ।
महाशाखाका अनुसार आज राति भने गण्डकी प्रदेश, कोशी प्रदेश र कर्णाली प्रदेशको पहाडी भूभागका एक–दुई स्थानमा चट्याङ्गसहित हल्का वर्षाको सम्भावना रहेको छ ।
- न्युज बहार संवाददाता