भदौ १७, काठमाडौँ। काठमाडौँ महानगरपालिकाका मेयर बालेन शाहले शनिबार राति आफ्नो फेसबुक मार्फत महानगरपालिकाको गाडी रोके सिंहदरबारमा आगो लगाउने चेतावनी दिएका थिए । कसले र किन महानगरको गाडी रोकेको थियो भन्ने उनले खुलाएका थिएनन् । यसरी अभिव्यक्ति दिएको भन्दै बालेनको सार्वजनिक रुपमा आलोचना र यसपछाडीको कारण के भन्ने सबैतिर चर्चा हुन थालेपछी आइतबार उनको सचिवालयले विज्ञप्ति जारी गर्दै घटनाबारे जानकारी गराएको छ ।
उनको निजी सचिवालयले सार्वजनिक गरेको विज्ञप्तिमा मेयर पत्नी सविना काफ्लेमाथि सुत्केरी अवस्थामा प्रहरीले चेकजाँचका नाममा अनावश्यक केरकार गरिएको बताएको छ ।बालेनको स्वकीय सचिवालयका अनुसार मेडिसिटी अस्पतालमा बालेन दम्पतीका शिशु एनआईसीयूमा उपचाररत रहेका छन् । बालेनकी पत्नी सविनाको स्वास्थ्यमा शनिबार साँझ जटिलता देखिएपछि बालेनले चढ्ने महानगरको गाडीमा अस्पताल गएकी थिइन् ।
शिशुलाई स्तनपान गराइ र आफ्नो स्वास्थ्य परीक्षण गरेर घर फर्किंदा सविना चढेको गाडीलाई कोटेश्वरमा चेकजाँचमा बसेको ट्राफिक प्रहरीले रोकेको थियो । बालेनको स्वकीय सचिवालयले त्यस क्रममा प्रहरीले दुर्व्यवहार गरेको जनाएको छ ।
शारीरिक समस्या र प्रसव पीडामा रहेकी सविनामाथि प्रहरीबाट भएको व्यवहार असभ्य र निन्दनीय भएको बालेनको स्वकीय सचिवालयले उल्लेख गरेको छ ।
विज्ञप्ति
- न्युज बहार संवाददाता
