मंसिर १५, काठमाडौँ । उच्च अदालत पाटनले भुटानी शरणार्थी प्रकरणमा शुक्रबार आदेश गरेको छ । उच्च अदालतले मंसिर ५ गतेदेखि भएको निरन्तर सुनुवाइपछि आज शुक्रबार जिल्ला अदालतको ९ जनालाई थुनामै राख्ने आदेश सदर गरेको छ ।
प्रतिवादीहरु डा.इन्द्रजित राई, टेकनारायण पाण्डे, केशव प्रसाद दुलाल, टोपबहादुर रायमाझी, सागर राई,सानु भण्डारी, आङटावा शेर्पा, गोविन्दकुमार चौधरी र सन्देश शर्मालाई उच्च अदालत पाटनका न्यायाधीशद्वय प्रकाश खरेल र जनक पाण्डेको इजलासले थुनामा पठाउने काठमाडौँ जिल्ला अदालतको आदेश सदर गरेको हो ।
त्यस्तै थुनामै राख्ने काठमाडौँ जिल्ला अदालतले आदेश दिएका प्रतिवादीहरु हरिभक्त महर्जनसँग १५ लाख, नरेन्द्र केसीसँग १० लाख, सन्दीप रायमाझीसँग ३० लाख, शमशेर मियासँग १० लाख, रामशरण केसीसँग १५ लाख र टेकनाथ रिजालसँग १५ लाख धरौटी माग गरेको छ । उच्च अदालतद्वारा धरौटी माग गरेकाहरुले माग गरेको धरौटी बुझाएमा उनीहरु थुनामुक्त भई मुद्दाको पुर्पक्ष गर्न पाउनेछन् ।
त्यसैगरी काठमाडौँ जिल्ला अदालतले धरौटी लिई थुनामुक्त गरेको केशव तुलाधर र लक्ष्मी महर्जनलाई उच्च अदालत पाटनले पनि साधारण तारेखमै रिहा गर्नेलाई साधारण तारेखमा छाड्ने आदेश दिएको छ भने त्यसैगरी यसअघि थुनामा पठाइएका टंक गुरुङ र आशिष बुढाथोकीलाई पनि साधारण तारेखमै रिहा गर्न उच्च अदालत पाटनले आदेश दिएको छ ।
दुई न्यायाधीशको राय प्रतिवादी बालकृष्ण खाँणको हकमा भने बाझिएको छ । दुई न्यायाधीशको राय बाझिएपछी तेश्रो न्यायाधीशको इजलासमा सुनुवाइका लागि पेश गर्ने आदेश भएको छ । खाँणको बारेमा तेश्रो न्यायाधीशको आदेशपछि धरौटीमा छुट्ने वा थुनामै रहने भन्ने आदेश हुनेछ ।
- न्युज बहार संवाददाता
