फागुन २७, काठमाडौँ । नेपालमा भीआईपी कल्चर अन्त्य हुनुपर्ने उपप्रधान एवम् गृहमन्त्री रवि लामिछानेले बताएका छन् । लामिछानेले आज आइतबार प्रहरी प्रधान कार्यालयको निरीक्षणपछि प्रदेशका डीआईजीहरु र देशभरका जिल्ला प्रहरी प्रमुखलाई भिडियो कन्फेरेन्समार्फत निर्देशन सम्बोधन गरेका छन ।
भिडियो कन्फेरेन्समार्फत उनले भने– ‘भीआईपी संस्कार अन्त्य गर्नुपर्छ, मलाई एउटा पिएसओ मात्र दिए पुग्छ ।’
गृहमन्त्री लामिछानेले प्रहरीमा बढुवा र सरुवा हुन मन्त्रीको धाउनुपर्ने व्यवस्थाको अन्त्य गरिने घोषणा गरेका छन् । आफू पहिलोपटक गृहमन्त्री हुँदा वर्तमान आईजीपी वसन्त कुँवरलाई भनसुन बिना नै मधेश प्रदेशको प्रमुख बनाएको उदहरण पेस गर्दै उनले भने ‘सरुवा र बढुवाका लागि मन्त्री र सचिवको ढोका चहार्ने प्रथाको अन्त्य गर्नुपर्छ र गर्छु।’
यसैबिच लामिछानेले प्रहरी अधिकृतहरू निजी फाइदाका लागी आफूकहाँ आएमा ढोका बन्द गरिने समेत आजको कन्फेरेन्स मार्फत जानकारी दिएका छन । यस विषयमा उनले उनले भने– ‘सोर्स फोर्स लाउन आउनेका लागि मेरो ढोका बन्द हुन्छ ।’
- न्युज बहार संवाददाता
