फागुन ११, काठमाडौं । अब बाट काठमाडौं उपत्यकामा प्रति घन्टा ५० किलोमिटर भन्दा बढीको स्पीडमा गाडी गुडाउन नपाइने भएको छ । उपत्यका ट्राफिक प्रहरी कार्यालयले सवारी तथा यातायात व्यवस्था ऐन २०४९ र नियमावली २०५४ मा उल्लेखित गति नियन्त्रण सम्बन्धी व्यवस्था लागु गर्दै यो नियम ल्याएको हो । त्यस्तै सडकको भौतिक अवस्था समेतलाई मध्यनजर राखी सवारी दुर्घटना न्यूनीकरण तथा रोकथामका लागि कलंकी-कोटेश्वर सडक खण्डको फास्ट ट्रयाकमा ५० किलोमिटर र अन्य सर्भिस ट्रयाकमा २० किलोमिटर गति तोकिएको जनाएको छ ।
यस्तै कोटेश्वर-भक्तपुर सडक खण्डमा पनि प्रति घन्टा ५० किलोमिटर गति तोकिएको छ । यस सगै उपत्यकाको अन्य स्थानमा पनि आवश्यकता अनुसार गति सिमा तोकीएको छ र सोही स्थानमा गति सिमाका बोर्डहरू समेत राखिएको ट्राफिक प्रहरीले जनाएको छ । तोकिएको गतिभन्दा बढीमा सवारी चलाएमा चालकलाई ट्राफिक प्रहरीले जरिवाना गर्दै आएको छ । र अब पनि त्यही जरिवानाको सजाय हुने ट्रफिक प्रहरीले जनाएको छ ।
