असोज २८, काठमाडौँ । दशैँपछिको अर्को महान चाड तिहारले अहिले नेपालीको घरआँगनमा रौनक ल्याएको छ। नेपालीहरुको दोस्रो महान चाड तिहार रंगीचंगी फूल, बत्ती र मिठाईको पर्व हो।

तिहारमा समयमा चिनीको माग उच्च हुने भएकाले बजारमा ठूला उद्योग र पसलहरूले विभिन्न प्रकारका मिठाई उत्पादन गर्छन् भने घरघरमै रोटी लगायतका परिकार बनाइन्छन्। विगतमा सरकारी संयन्त्रबाट पर्याप्त चिनी आयात नहुँदा व्यापारीहरूले कृत्रिम अभाव सिर्जना गरी उपभोक्तालाई महँगोमा चिनी बेच्ने गरेका उदाहरण छन्।

तर, यस वर्ष भने सम्बन्धित निकायहरूले चिनी सहजै उपलब्ध हुने र मूल्य नबढ्ने विश्वास दिलाएका छन्। उद्योग, वाणिज्य तथा आपूर्ति मन्त्रालयले तिहार र छठ पर्वमा चिनीको अभाव नहुने स्पष्ट पारेको छ। मन्त्रालयका सहसचिव शिवराम पोखरेलले अहिले बजारमा चिनीको पर्याप्त मौज्दात रहेको र आपूर्तिको व्यवस्था पनि व्यवस्थित गरिएको जानकारी दिएका छन्।

• न्युज बहार संवाददाता