जेठ २८, काठमाडौँ । ‘हप अन हप अफ’ बसमा चढेर मिस नेपाल २०२३ का विजेताले सम्पदाहरुको यात्रा गरेका छन् । शनिबार मिस नेपाल २०२३ का विजेताहरुले काठमाडौँका सम्पदा यात्रा गरेका हुन् ।
उनीहरुले काठमाडौँ उपत्यकामा रहेका प्रमुख सम्पदा क्षेत्रको प्रवर्द्धन गर्ने उद्देश्यले सुरु भएको सम्पदा घुम्ती बस सेवामार्फत पशुपतिनाथ, नारायणहिटी, स्वयम्भु र बौद्ध क्षेत्रको भ्रमण गरेका हुन् ।
नेपाल पर्यटन बोर्डले साझा यातायातसँगको सहकार्यमा विश्वसम्पदा सूचीमा सूचीकृत सम्पदासम्म सहज पहुँच हुने गरी यही जेठ ९ गते देखि सम्पदा घुम्ती बस सेवा परीक्षणका रुपमा सञ्चालनमा ल्याएको छ ।
सोही घुम्ति बससेवाको शनिबार ललितपुरबाट सुरु गरिएको यात्रामा मिस नेपाल वर्ल्ड २०२३ सृच्छा प्रधान, मिस नेपाल अर्थ २०२३ रेना मजगैया, मिस नेपाल इन्टरनेसनल २०२३ प्रसिद्धी शाह र मिस नेपाल अर्थ २०२२ डा. सरिशा श्रेष्ठ सहभागी रहेका थिए ।
उनीहरुको साथमा नेपाल पर्यटन बोर्ड, साझा यातायातका कर्मचारीहरु पनि यात्रामा सहभागी भएका थिए ।
- न्युज बहार संवाददाता
