असार ३, काठमाडौँ । महानगरभित्रका हलमा काठमाडौँ महानगरपालिकाले भोली सोमबारदेखि भारतीय फिल्मको प्रदर्शन रोक्ने भएको छ ।
मेयर बालेन शाहको सचिवालयले नगर प्रहरीलाई खटाएर भारतीय फिल्मको प्रदर्शन रोक्न निर्देशन दिइसकिएको जानकारी दिएको छ। मेयर बालेन शाहको निर्देशनपछि नगर प्रहरीले आइतबार बेलुकासम्म महानगरभित्रको सबै हलमा पुगेर भारतीय फिल्म नचलाउन निर्देशन दिने बताएको छ ।
सचिवालयले भन्यो ‘मेयरको निर्देशनपछि भोलिदेखि काठमाडौँ महानगरका सबै हलमा भारतीय फिल्मको प्रदर्शन रोक्ने निर्णय भएको हो । यसका लागि नगर प्रहरी आजैदेखि खट्ने भएका छन,’ । काठमाडौँ महानगर भित्र मात्रै ३२ वडामा १७ फिल्म हल रहेका छन् ।
अहिले रिलिज भइरहेको भारतीय फिल्म ‘आदिपुरुष’मा समावेश ‘जानकी भारतकी छोरी हुन्’ भन्ने वाक्यलाई भारतमा पनि सच्याउन मेयर शाहले फेसबुक स्टाटसमार्फत तीन दिनको अल्टिमेटम दिएका थिए ।
तर बालेनले आइतबार तीन दिन सकिंदासम्म उक्त संवाद नसच्चिएको भन्दै सोमबारदेखि भारतीय फिल्म रोक्न निर्देशन दिएका हुन् ।
- न्युज बहार संवाददाता
