साउन २८, बागलुङ । पहिलोपटक बागलुङमा बागलुङका निर्माण व्यवसायी विमलेश आचार्यले ड्रागन फ्रुटको व्यावसायिक उत्पादन थालेका थिए । बागलुङमा व्यावसायिक खेती थालेको एक वर्षमै ड्रागन फ्रुटले उत्पादन दिन थालेपछि अहिले यहाँ यसको उच्च माग हुन सुरु भएको छ ।  

बागलुङ नगरपालिका–१ रामरेखाका उनले बहुगुणी फलफूलका रुपमा रहेको ड्रागन फ्रुटको व्यावसायिक खेती थालेका पहिलो चरणमा यसको फल उत्पादन गरी रु एक लाखमा  एक सय ५० केजी फ्रुट बिक्रीसमेत गरिसकेको बताएका छन ।

आचार्यले रातो रङ्गको ड्रागन फ्रुटको व्यावसायिक खेती गरेका हुन। एक वर्षमै उत्पादन दिन थालेपछि आफू दङ्ग परेको उनले जनाएका छन । जिल्लामै उनी ठूलो क्षेत्रफलमा ड्रागन खेती गर्ने पहिलो कृषक हुन् । आचार्यले भने “छ रोपनी जग्गामा गरिएको उक्त खेतीबाट अहिले उत्पादन सुरु भइरहेको छ, पहिलो चरणमा एक सय ५० केजी ड्रागन फ्रुट बिक्री भइसकेको छ, दोस्रो चरणमा अझ धेरै उत्पादन हुन्छ, माग अत्यधिक भएकाले फार्मबाटै फ्रुट बिक्री भइरहेको छ ।”  उनका अनुसार उनले लगाएको ड्रागन फ्रुट सी भेराइटी मध्येको रातो जातको हो । प्रतिकेजी रु पाँच सयका दरले आचार्यले अहिले ड्रागन फ्रुट बिक्री गरिरहेका छन् ।

• न्युज बहार संवाददाता