चैत १५, झापा । यस सिजनको चियाको पहिलो टिपाई इलामबाट सुरु भएको छ । इलाम जिल्लाको तल्लो क्षेत्रमा चियाको टिपाइ सुरु भएको छ भने माथिल्लो क्षेत्रमा भने अझै सुरु हुन बाँकी रहेको छ ।

चिया कृषकका अनुसार बिगत कात्तिकदेखि बन्द भएको चिया टिपाइ चैत लागेपछि सुरु भएको हो । चियाको पहिलो टिपाइलाई ‘फस्ट प्लग’ भन्ने गरिन्छ । यस यामको चियामा पानीको मात्रा कम हुने भएकाले यसलाई राम्रो चियाका रूपमा लिइन्छ । पहिलो टिपाइबाट तयार हुने चिया उच्च गुणस्तरको हुने भएकाले महँगो मूल्यमा बिक्री हुने गरेको छ ।

चैतदेखि जिल्लाका तल्लो क्षेत्र माई नगरपालिकाको दानाबारी, रोङ गाउँपालिकाको विभिन्न क्षेत्रमा चियाको टिपाइ सुरु हुन्छ । इलाम बजार क्षेत्र र केही माथिल्लो स्थानमा भने भर्खरै चिया पलाउन सुरु भएको छ । माइजोगमाई गाउँ माथिल्लो क्षेत्रमा सन्दकपुर गाउँपालिकाको सुलुबुङ लगायतमा चियाको बोटमा मुना पलाउन थालेका छन् । 

• न्युज बहार संवाददाता