माघ २४, कञ्चनपुर । कञ्चनपुर जिल्लामा शुक्लाफाँटा राष्ट्रिय निकुञ्ज विस्तारका क्रममा बेलौरी नगरपालिका–३ पडावमा पुनःस्थापन भएका धम्मलराज चौधरीले अढाई बिघा जमिनमा व्यावसायिक तरकारी खेती गरेका छन् ।

उनले निकुञ्जबाट विस्थापित हुँदा दश कट्ठा जग्गा पाएका थिए । पाँच दाजु-भाइलाई दश कट्ठा जग्गा बाँड्दा दुई कट्ठा उनको भाउमा आएको थियो । उनले सोही दुई कट्ठा जमिनमा खेती किसानी गरेर जीविका चलाउँदै आएका उनले अहिले व्यावसायिक तरकारी खेतीबाट भएको आम्दानीले ११ कट्ठा जग्गा जोड्न सफल भएका छन ।

उनले विगत आठ वर्षदेखि गाउँमा तरकारी खेती गरिहेका छन भने आफुले वार्षिक रु नौ लाख सम्म बचत गर्ने गरेको उनी बताउँछन ।  उनले भने “मैले सुरु गरेको तरकारी खेतीबाट भएको आम्दानीले मेरो परिवारको आर्थिक अवस्थामा सुधार आउनाका साथै गाउँका अरू किसान पनि तरकारी खेतीतर्फ आकर्षित भएका छन् ।” उनका अनुसार उनले उत्पादन गरेको तरकारी महेन्द्रनगर, धनगढी, बेलौरी र आइबीआरडीलगायत बजारहरुमा बिक्री हुने गरेको छ ।

कञ्चनपुरमा पछिल्ला केही वर्षयता चौधरीजस्तै व्यावसायिक तरकारी खेतीमा थारू समुदायकको सक्रियता बढ्दै गएको पाइएको छ । पुस्तौँदेखि उनीहरुले खेती र पशुपालनबाट जीविका चलाउँदै आएकोमा नगदे बालीका रुपमा तरकारी खेती थालेपछि आयआर्जन समेत बढेको किसानहरु बताउँछन।

• न्युज बहार संवाददाता