साउन ३०, गण्डकी । गण्डकी प्रदेशमा वस्तुभाउमा देखिने विभिन्न रोगविरुद्ध पूर्णखोप कार्यक्रम सञ्चालन गरिएको छ । कृषि तथा भूमि व्यवस्था मन्त्रालयले प्रदेशका ७५ प्रतिशत पशुपालक किसानको घरगोठमा खोप सेवा पुगेको जनाएको हो ।
मन्त्रालयको योजना तथा अनुगमन महाशाखा प्रमुख डा गृष्म न्यौपानेले गण्डकीका ८५ पालिकामध्ये एक महानगरपालिका, ३८ गाउँपालिका र २३ नगरपालिकाका पाँच सय ८० वडामा पूर्णखोप कार्यक्रम सञ्चालन गरिएको जानकारी दिएका छन ।
न्यौपानेका अनुसार गाईभैँसीलाई लाग्ने भ्यागुते, चरचरे, खोरेत, बाख्रामा देखिने पिपिआर, बङ्गुरमा देखिने क्लासिकल स्वाइन फिभर र कुकुरलाई लाग्ने रेबिज रोगविरुद्ध खोप अभियान सञ्चालन गरिएको हो ।
गत आर्थिक वर्षमा मात्र चरचरे र भ्यागुतेको तीन लाख ९६ हजार ५०, खोरेतको छ लाख २८ हजार छ सय १५ डोज, पिपिआरको ११ लाख ८४ हजार ६० र क्लासिकल स्वाइन फिभरको ८० हजार एक सय ३८ तथा रेबिजको ४२ हजार दुई सय ८० डोज खोज लगाइएको मन्त्रालयले जानकारी दिएको छ ।
- न्युज बहार संवाददाता
