जेठ १९, तनहुँ । तनहुँ जिल्लाको व्यास नगरपालिका–५ ढोडेनी भन्ने ठाउँमा व्यावसायिक रूपमा ‘ड्रागन फ्रुट’ खेती सुरु गरिएको छ। ढोडेनीका स्थानीय कृषक कल्पना गौली पनि व्यावसायिक ‘ड्रागन फ्रुट’ खेतीमा लागेकी छिन। उनी ‘माँ अम्बे अलौकिक कृषि फार्म’ दर्ता गरी व्यावसायिक रूपमा ड्रागन खेतीतर्फ लागेका हुन्।
बीस वर्षका लागि करिब नौ रोपनी क्षेत्रफल जग्गा भाडामा लिएर वार्षिक रू बीस हजार भाडा बुझाउने गरी व्यवसाय थालेको कृषक गौलीले बताउनुभयो।
उहाँले भन्नुभयो “गत वर्ष भारतको हैदरावादबाट प्रतिबिरुवा रू एक सयका दरले दुई हजार एक सय ड्रागनका बिरुवा ल्याएर लगाएकी थिए । यस वर्षदेखि उत्पादन दिन सुरु गरेको छ।”
उनको ड्रागन खेतीमा यस वर्ष लपक्कै फूल फुलेका छन् । कृषक गौलीले भन्नुभयो, “फूल फुलेअनुसार फल लाग्ने हो भने राम्रै उत्पादन हुन्छ भन्ने विश्वास लिएको छु।”
- न्युज बहार संवाददाता
