जेठ ५, जुम्ला । जुम्लाको तातोपानी गाउँपालिका–१ तरापीमा लगाइएको करिब ४५ हजार स्याउका बिरुवामा ‘टेन्ट क्याटरपिलार’को आक्रमण भएको छ ।

तातोपानी–१ राँका गाउँवासी तीन सय परिवारले लगाएको स्याउ बगैँचामा टेन्ट क्याटरपिलारको आक्रमणबाट स्याउका बिरुवामा क्षति पुगेपछि किसानहरु चिन्तित बनेका छन् ।

गाउँपालिकाको कृषि शाखाका प्रमुख पदमबहादुर नेपालीले लाखौँको सङ्ख्यामा रहेका टेन्ट क्याटरपिलारले स्याउका पात, डाँठ र बोक्रासमेत खान थालेपछि स्याउका बोटमा क्षति पुगेको जानकारी दिएका छन।
शाखा प्रमुख नेपालीले भने, ‘तीन सय घर परिवार रहेको राँका गाउँको तरापीमा ‘एक घर, एक बगैँचा’को अवधारणाअनुसार प्रतिघर परिवारले एक सय ५० स्याउका बिरुवा लगाएर बगैँचा स्थापना गरेका छन्”, तर ती सबै स्याउका बोटका पात टेन्ट क्याटरपिलारले सखाप पारेपछि सबै जना चिन्तित भएका छन।’  उनले भने ‘जुम्ला अर्गानिक जिल्ला घोषणा भइसकेकाले विषादी छर्न नपाइने हुँदा टेन्ट क्याटरपिलार कसरी देखियो र यसलाई कसरी हटाउने भन्ने कुरा गाह्रो भएको छ।’
उनले जलवायु परिवर्तनका कारण पछिल्लो समयमा स्याउमा समेत विभिन्न रोग देखिन थालेको बताएका छन ।  
कृषि विकास कार्यालयका प्रमुख गणेशबहादुर अधिकारीले तरापीमा लगाइएको ठूलो सङ्ख्याका स्याउका बिरुवामा देखिएको क्याटरपिलारको समस्यासँग सम्बन्धित प्रतिवेदन आएसँगै अहिले जुम्लामा पाइने देवदारको तेलसँग पानी मिसाएर छर्कने सल्लाह दिइएको जानकारी दिएका छन ।
उनले भने, ‘टेन्ट क्याटरपिलार नियन्त्रणमा लिन हामी अहिले जैविक विषादी पनि खोजी रहेका छौँ, त्यसले समस्या हल गर्न नसक्ने अवस्था भए विकल्प पनि खोज्नुपर्ने हुन्छ।’

• न्युज बहार संवाददाता