असार
२६, बेतडी। बैतडी जिल्लामा लम्पी स्किन रोग प्रकोपकै रूपमा फैलिएको छ। भेटेरेनरी
अस्पताल तथा पशु सेवा विज्ञ केन्द्र पाटनले घरपालुवा पशुमा देखिएको यो रोग
नियन्त्रणबाहिर गएको जनाएको छ।
केन्द्रका
पशु विकास अधिकृत तथा लम्पी स्किन सम्पर्क व्यक्ति डा विशाल पाठकले यो रोग
नियन्त्रणबाहिर पुग्दा पनि जिल्लामा हालसम्म खोपको उपलब्धता हुन नसकेको जानकारी
दिएका छन।
यो रोगबाट बैतडी जिल्लामा हालसम्म ६४ हजार एक सय ९७ घरपालुवा पशु सङ्क्रमित छन् भने उक्त रोगका कारण नौ हजार दुई सय ९८ पशुचौपाया मरिसकेका उनले बताएका छन ।
बाच्छाबाच्छी, गाईगोरू र भैँसी लम्पी स्किनका कारण बढी प्रभावित भएका छन्। ‘लम्पी स्किनको सङ्क्रमण दिनप्रतिदिन बढिरहेको भए पनि हालसम्म जिल्लामा खोपको उपलब्धता हुनसकेको छैन’ उनले भने। ‘प्रदेश र केन्द्र सरकारलाई खोपको उपलब्धताका लागि अनुरोध गरिसकेका छौं।’
यो रोग मच्छर, झिङ्गा र किर्नाले टोकेमा वा दानापानी, चरन क्षेत्र र पशुको आपसमा सङ्सर्गका माध्यमबाट फैलिने भएकाले सबैलाई सचेत रहन अपिल गरिएको छ।
रोगलाई केही हद सम्म नियन्त्रण गर्न किसानले भुसुना, किरा र लामखुट्टे नियन्त्रणका लागि गोठको सरसफाइ, भकारो र पर्सो व्यवस्थापन र चरन क्षेत्र जस्ता विषयमा बढी ख्याल गर्नुपर्ने जनाइएको छ।
- न्युज बहार संवाददाता
