मंसिर १९, भरतपुर । नेपाल चराहरुको बासस्थानका रुपमा परिचित छ । याहाँ आठ सय ९४ प्रजातिका चराहरु पाइन्छन् । ती आठ सय ९४ प्रजातिमध्ये नेपालमा मात्र पाइने चरा हो काँडेभ्याकुर । चितवनको पर्यटकीय क्षेत्र तथा पुरानो सदरमुकाम उपरदाङगढी र अग्लो डाँडा सिराइचुलीमा यही चरा अर्थात काँडेभ्याकुर हेर्न विदेशी पर्यटकहरु पुग्ने गरेका छन् ।

सबैभन्दा धेरै काँडेभ्याकुर चरा पाइने क्षेत्र यही नै हो । विश्वका विभिन्न देशबाट यस चरा हेर्न पंक्षीप्रेमी पर्यटक नेपालमा आउने गरेका छन ।

काँडेभ्याकुर हेर्न पाएर आफू उत्साहित भएको बेलायतदेखी चरा हेर्न उपरदाङगढी आएका माइक होइटले बताए । वातावरणका क्षेत्रमा समेत काम गर्दै आएका होइटले भने, ‘नेपालमा मात्रै पाइने चरा यस क्षेत्रमा प्रशस्तै देख्न पाइयो, म चरा हेर्नकै लागि नेपाल आएको हो।’

उनका अनुसार चरा संरक्षणमा समुदायको प्रमुख दायित्व हुने गर्दछ । चितवनको उपरदाङगडी काँडेभ्याकुरको बासस्थानको ‘हटस्पट’ भएको वर्ड एजुकेसन सोसाइटी चितवनका अध्यक्ष टीकाराम गिरीले बताए । उनले भने, ‘उपरपरदाङगढी प्रकृति प्रेमीका लागि उत्तमस्थल मानिन्छ’, यहाँ आउँदा काँडेभ्याकुर नदेखी फर्कनुपर्दैन।’

काँडेभ्याकुरको सादा रङका आँखा, खैरो जिउ र धर्का भएको छाति हुन्छ निकै सुन्दर र आकर्षक हुने यो चरा मध्यपहाडी इलाकामा बस्न रुचाउने गर्दछ । यसले गर्मीयाममा एक हजारदेखि एक हजार पाँच सयसम्म दुई हजार एक सय मिटरको उचाइमा बिताउँछ ।

• न्युज बहार संवाददाता