फागुन १, काठमाडौँ । अब सगरमाथा र आसपासका हिमाल चढ्ने आरोहीहरूले आफूले गरेको दिसा-पिसाब आफुले नै फिर्ता ल्याउनुपर्ने भएको छ।

खुम्बु पासाङल्हामु गाउँपालिकाले आधार शिविर व्यवस्थापन कार्यविधि, २०८० लागू गर्दै यस्तो व्यवस्था ल्याएको जनाएको हो ।

गाउँपालिकाले उक्त कार्यविधि अनुसार जीविकोपार्जनमा असर पुर्‍याएको भन्दै फोहोरमैला व्यवस्थापनसम्बन्धी स्थानीय तहको अधिकार प्रयोग गर्दै यस्तो व्यवस्था गरेको हो । गत मंगलबार उक्त कार्यविधि कार्यपालिका बैठकबाट स्वीकृत भई कार्यान्वयनमा आएको हो।

कार्यविधिमा गाउँपालिकाले हिमाल आरोहणका क्रममा आरोहीहरूले गर्न हुने र नहुने क्रियाकलापहरू उल्लेख गरेको छ।

कार्यविधिमा उल्लेख भए अनुसार अब आरोहीले हिमाल चढ्ने क्रममा आफूले गरेको दिसा-पिसाब फिर्ता ल्याउनुपर्ने छ। कार्यविधिमा मानव फोहोरको व्यवस्थापनका तथा विसर्जन गर्नको लागि आधार शिविरभन्दा माथि अनिवार्य रूपमा 'पुप ब्याग' अथवा 'बायोडिग्रेडेबल ब्याग' को प्रयोग गर्नुपर्ने उल्लेख गरिएको छ ।

पर्यटन विभागले सामान्यतया सगरमाथा आरोहणका लागि ७५ दिनको अनुमति दिन्छ। कतिपय आरोहीहरूले केही दिनमै आरोहण गर्ने गरेका छन् भने केहीले लामो समय लगाउने गर्छन ।

पर्वतारोहणमा जति नै दिन लगाए पनि यो नयाँ नियम कार्यान्वयनसँगै अब हिमालहरू सफा हुँदै जाने विभागका पर्वतारोहण शाखाका निर्देशक राकेश गुरूङले जनाएका छन । 

• न्युज बहार संवाददाता