पुस १२, तनहुँ। तनहुँ जिल्लाको बन्दीपुर गाउँपालिकाले ‘घुम्न जाऔँ बन्दीपुर’ अभियान थालनी गरेको छ । बन्दीपुर ‘पहाडकी रानी’ उपनामले परिचित  छ । गाउँपालिकाको सक्रियतामा बन्दीपुरको पर्यटन प्रवद्र्धनका लागि उक्त अभियान सुरु गरिएको हो । 

थप आन्तरिक तथा बाह्य पर्यटकलाई बन्दीपुर भित्र्याउन  अभियान सुरु गरिएको जानकारी बन्दीपुर गाउँपालिकाका अध्यक्ष सुरेन्द्र थापाले दिएका छन । बन्दीपुरमा क्रियाशील पर्यटन व्यवसायी, होटल व्यवसायीको सहभागितामा यसका लागि देशका विभिन्न सहरमा पुगेर बन्दीपुरको पर्यटनको प्रचारप्रसार गरिनेछ । 

अहिले अध्यक्ष थापाको नेतृत्वमा अभियानअन्तर्गत टोली बुटवल पुगेको छ । अहिले बुटवलमा पुगेर बन्दीपुरको प्रचारप्रसार गर्दै घुम्नका लागि निम्तो दिने कार्यक्रम भइरहेको छ । अध्यक्ष थापाका अनुसार देशका प्रमुख सहरमा पुगेर घुम्न जाऔँ बन्दीपुरको प्रचारप्रसार गरिएको छ भने यसले गर्दा बन्दीपुरको पर्यटन प्रवद्र्धनमा सहयोग पुग्ने छ।

बन्दीपुरको प्रचारप्रसारका लागि यो अभियान फलदायी हुने विश्वास पर्यटन विकास समितिका अध्यक्ष किसान प्रधानले व्यक्त गरेका छन । “बन्दीपुर स्वदेशी तथा विदेशी पर्यटकको गन्तव्यस्थलको रुपमा विकास भइरहेको छ”, उनले भने,  “यसको थप प्रचारप्रसार गर्न आवश्यक रहेकाले यो अभियान सुरु भएको हो ।”

आगामी माघ महिनामा सिद्धगुफा महोत्सव आयोजना गरी सिद्धगुफाको प्रचारप्रसार गर्ने लक्ष्य गाउँपालिकाले राखेको छ ।

• न्युज बहार संवाददाता