असोज १२, काठमाडौँ । रास्वपा - राष्ट्रिय स्वतन्त्र पार्टीका सभापति रवि लामिछानेले पुराना दललाई मुलुकमा व्याप्त बेथितिको ठिक गर्ने अन्तिम अवसरको रूपमा बाँकी ४ वर्ष मिलेर काम गर्न सचेत गराएका छन् ।
आज शुक्रबार उनले आफ्नो सामाजिक सञ्जाल फेसबुकमार्फत एक अपिल जारी गर्दै अन्तिम अवसरको सदुपयोग गरी विगत ३३ वर्षको गल्ती सच्चाउन पुराना दललाई सचेत गराएका हुन् ।
सबै पुराना दललाई सहमति गरेर सरकार चलाउन आग्रह गर्दै उनले आफूहरूले प्रतिपक्षी मोर्चा सम्हाल्ने बताएका छन्।
उनले लेखेका छन "४/४ वर्ष बाँकी छ, गर्नुस् काम र आफ्नो अपार क्षमता देखाइदिनुस् । तपाईंहरूलाई जनताले यसरी भोट दिऊन् कि हाम्रो जमानत जफत होस्। मुलुकमा ४ वटा सही निर्णयले मात्रै पनि धेरै सुधार हुन सक्छ, तपाईंहरूसँग ४/४ वर्ष छ। गर्नुस् निर्णय र देखाइदिनुस् हामी सबैलाई।"
उनले अन्तिममा लेखेका छन "एउटा सटर त राजनीतिको बन्द हुनै पर्छ हजुर!! कि तपाईंको कि हाम्रो। ४ वर्षअघि नै एड्भान्समा घन्टी बजाएर सचेत गराएको छु, सोच्नु होला।"
- न्युज बहार संवाददाता
