भदौ ७, काठमाडौँ । सुदूरपश्चिम र मध्यपश्चिमवासीले आज उमा महेश्वरसहित दुवोको पूजा गरेर उज्याली गौरा एवं दुर्वाष्टमी पर्व मनाउँदैछन् ।
यो पर्व हरेक वर्ष चान्द्रमासअनुसार भाद्र महिनामा मनाइने गरिएको भएता पनि यस वर्ष भने वर्ष भाद्र शुक्ल अष्टमी अघि नै श्रावण शुक्ल अष्टमीकै दिन मनाइएको हो । उज्याली गौरा शुक्ल पक्षमा मनाइन्छ भने अँध्यारी गौरा कृष्ण पक्षमा मनाइने गरिन्छ । यसैले यस वर्षको यो गौरालाई उज्याली भनिएको हो ।
सुदूरपश्चिम र मध्य पश्चिम क्षेत्रका मानिसले गौरालाई ऐतिहासिक मौलिक पर्वका रुपमा लिने गरेका छन् । देउडा संस्कृतिविद् गायक नन्दकृष्ण जोशीले सत्य युगमा हिमालय पुत्री पार्वतीले महादेव स्वामी पाऊँ भनी केहीको डर नमानी तपस्या गरेपछि मनोकामना पूरा भएको सम्झनामा देशको पश्चिम क्षेत्रमा यो पर्व मनाउन सुरु गरिएको बताउँछन ।
देउडा संस्कृतिविद् जोशीले गौरा पूजा गर्नका लागि पाँच वनस्पति प्रयोह गरिने बताए। यसमा काँस, कुश, सामा (सौं), अपामार्ग र तितेपाती कतै कतै तिलको बिरुवा पनि राखेर देवीको आकार बनाउने चलन छ । भाद्र कृष्ण अष्टमीका दिन यसरी बनाइएको देवीलाई गाउँको सफा घरमा भित्र्याएर बर्तालुहरुले निराहार बसी पूजा गर्ने परम्परा रही आएको छ ।
- न्युज बहार संवाददाता
