असार १, काठमाडौँ। काठमाडौँका हलहरुमा भारतीय फिल्म ‘आदिपुरुष’को बिहानी शो रोकिएको छ। ‘आदिपुरुष’ लाई लिएर विवाद चर्किएपछि चलचित्र संघको निर्देशनमा काठमाडौँ उपत्यकाका सबै फिल्म हलले शुक्रबार बिहानको प्रदर्शन रोकेका छन् ।
आइएनआई, क्यूएफएक्स, वान सिनेमाज, बिग मूभिजसहित मल्टिप्लेक्सले बिहानी शोलाई स्थगित गरेका हुन् ।
फिल्म हलको छाता संस्था चलचित्र संघले मुलुकभरमा विकसित परिस्थितीको कारण काठमाडौं उपत्यकाभित्रका सबै हलमा ‘आदिपुरुष’को बिहानी शो अनिवार्य रोक्न र उपत्यकाबाहिर परिस्थिती हेरेर चलाउन निर्देशन सहित सबै हललाई सर्कुलर पठाएको छ।
चलचित्र संघले काठमाडौँ महानगरका मेयर बालेन शाहको अभिव्यक्तिपछि उत्पन्न परिस्थितीलाई लिएर शुक्रबार बिहान आकस्मिक बैठक बोलाएको छ ।
उक्त बैठकमा मेयर शाहको अभिव्यक्तिबारे छलफल हुने र आदिपुरुषको प्रदर्शनलाई लिएर निर्णय हुने बताइएको छ ।
- न्युज बहार संवाददाता
