भदौ २५, कञ्चनपुर । कञ्चनपुर जिल्काको पुनर्वास नगरपालिका–५ उद्रीका देव बोगटीले १० कट्ठा जमिनमा गरेको धानखेती अहिले खेती पूरै सखाप भएको छ । धानका प्राय सबै बोट सुकेका छन् भने केही बोट रातो-पहेँलो भएर मरेका छन् ।
बोगटीले साउनमा दोदा नदीको बाढी खेतमा पसेपछि धानबाली सुक्दै गएको बताउँछन् । उनले भने, ‘बाढीपछि एकाएक धान सुक्न थाल्यो, विषादी छर्कियौँ तर सुधार भएन, आधा बिघा अधिया पनि बनाएका थियौँ, त्यहाँ पनि सबै बाली सखाप छ ।’
दोदा नदीमा साउन तेस्रो साता आएको बाढी बस्तीसम्मै पुगेर डुबान भएको थियो । डुबान भएको पानी घटेपछि एकाएक धानबाली सुक्न थालेको हो ।
पानी जमेको ठाउँमा दुई/तीन दिनसम्म गन्ध आइरहेको थियो भने पानी पनि कालो रहेको बोगटी बताउँछन । किसान धानबाली खेतमै सुकेपछि कृषि गरेर वर्षभरि खानलाई जोहो कसरी गर्ने भन्ने चिन्तित भएका छन् ।
पुनर्वास नगरपालिकाको उद्री, परासन, सिमरी र दोदा नदी किनारकै तीन सय बिघाभन्दा बढीको धानबाली सुकेर र कुहिएर सखाप भएको छ ।
किसानको भनाइ अनुसार खेत नजिकै रहेको भागेश्वर सुगर मिलले छाडेको केमिकल नालामा मिसिएर त्यही पानीले धान सुकेको हो । स्तानिय रमेश राना थारूले सुगर मिलले सिमरी नाला छेउमै डस्ट राखेको र त्यसबाटै केमिकल नालामा मिसिएर खेतमा पुगेको बताएका छन । क्षति भएको धान र उक्त क्षेत्रमा जमेको पानीको नमुना सङ्कलन गरी परीक्षणका लागि कृषि ज्ञानकेन्द्र कञ्चनपुरले काठमाडौँ पठाएको छ । रिपोर्ट केही दिनमा आउने बताइएको छ ।
- न्युज बहार संवाददाता
