बैशाख २४, पोखरा । हिजो शनिबार साँझ परेको असिनापानीका कारण गण्डकी प्रदेशको मकैबाली र लहरे तरकारीमा क्षति पुगेको छ ।
पोखरा महानगरपालिका वडा नं २३, २४, ३२, ३३ लगायत वडाका मकैबाली तथा लहरे तरकारीलाई साँझको समयमा हावाहुरीसहित आएको असिनापानीले क्षति पुगेको छ।
यस क्षति बारे महानगरपालिकाका कृषि महाशाखा प्रमुख मनोहर कडरियाले जानकारी दिएका हुन ।
महाशाखा प्रमुख कडरियाले केही स्थानमा क्षति पुर्याएको जानकारी आफुलाई प्राप्त भएको तर त्यसको यकिन विवरण भने प्राप्त नभइसकेको उनले बताएका छन ।
पोखरा महानगरपालिकाको वडा नं ३२ स्थित तल्लो गगनगौडाको बेलबुटे र बेलबुटे आसपासका क्षेत्रमा मकैबालीका साथै फल्ने बेला भएको लहरे तरकारीमा क्षति पुगेको स्थानीयवासीहरुले बताएका छन ।
हावाहुरीसहित आएको असिना पानीले मकैका पात छियाछिया बनाएको छ भने फल्ने तयारीमा रहेका लहरेबालीमा समेत क्षति पुगेको छ ।
- न्युज बहार संवाददाता
