असार २९, काठमाडौँ । देशभर असार चौथो सातासम्म कुल ५३ प्रतिशत क्षेत्रमा धान रोपाइँ सकिएको छ । यस वर्षको रोपाइँ गत वर्षको यसै अवधिको तुलनामा १२ प्रतिशतले कम रहेको कृषि तथा पशुपक्षी विकास मन्त्रालयले शुक्रबार सार्वजनिक गरेको विवरणमा उल्लेख गरिएको छ।

यस अवधिमा गत वर्ष ६५ प्रतिशत क्षेत्रफलमा रोपाइँ सकिएको थियो भने यस वर्ष ५३ प्रतिशत क्षेत्रफलमा मत्र रोपाइँ भएको हो।

३० असारसम्म यस वर्ष ७ लाख १८ हजार ५७६ हेक्टर क्षेत्रफलमा रोपाइँ सकिएको छ । सरकारी अनुमान अनुसार यस वर्ष १३ लाख ५७ हजार ८१६ हेक्टर क्षेत्रफलमा रोपाइँ हुनु पर्नेछ। यस अवधिमा सुदूरपश्चिम प्रदेशमा सबैभन्दा धेरै धान रोपाइँ भएको छ ।

मन्त्रालयका प्रवक्ता प्रकाशकुमार सञ्जेलले सुदूरपश्चिम प्रदेशमा ८५ प्रतिशत भूभागमा रोपाइँ सकिएको बताएका छन ।  यस्तै, यस वर्ष सबैभन्दा कम रोपाइँ धान उत्पादनको भण्डार मानिने मधेश प्रदेशमा भएको छ । यस प्रदेशमा हालसम्म २८ प्रतशित क्षेत्रफलमा मात्रै रोपाइँ सकिएको छ ।

• न्युज बहार संवाददाता