असोज २०, काठमाडौँ । आज दसैँको अन्तिम दिन कोजाग्रत पूर्णिमा । यस दिनलाई नेपालीहरूले दशैंको समापन र लक्ष्मीको स्वागतको रुपमा मनाउने परम्परा छ।

कोजाग्रत पूर्णिमालाई कौमुदी पूर्णिमा पनि भन्ने गरिन्छ । यसै दिनबाट १५ दिन लामो दुर्गा पक्ष अर्थात् बडादशैं औपचारिक रूपमा अन्त्य हुन्छ भने विजयादशमीदेखि सुरु भएको टीका र जमरा लगाउने परम्परा आजैको दिन, पूर्णिमासँगै समाप्त हुने शास्त्रीय मान्यता रहेको छ।

नेपाल पञ्चाङ्ग निर्णायक विकास समितिका अनुसार, आज बेलुकासम्म बलि पूर्ति नहुन्जेलसम्म दशैंको टीका र जमरा ग्रहण गर्न सकिन्छ। बिहानै दशैंघरमा राखिएको फूल, प्रसाद र जमरा आदि नजिकको नदी, पोखरी वा अन्य पवित्र स्थलमा विसर्जन गर्ने परम्परा छ।

भोलिदेखि कात्तिक स्नान सुरु हुने र आकाशदीप (आकाशमा बत्ती बाल्ने) दान गर्ने चलन पनि प्रारम्भ हुन्छ। यसलाई दशैंको बिदाइ र तिहारको तयारीको संकेतको रूपमा लिइन्छ। यो दिनलाई लक्ष्मीको विशेष पूजा गर्ने अवसरका रूपमा लिइन्छ जहाँ रातभर जाग्राम बस्दै धन र समृद्धिकी देवी महालक्ष्मीको आराधना गरिन्छ। धार्मिक विश्वास अनुसार, रातभर जाग्राम बसेर पूजा गर्नेको घरमा देवी महालक्ष्मी स्वयम् भ्रमण गर्न आउँछिन् र ऐश्वर्य प्रदान गर्छिन्।

• न्युज बहार संवाददाता