माघ २७, खोटाङ । खोटाङ जिल्लाको तुवाचुङ–जायजुममा निर्माण गरिएको पदमार्ग अहिले पर्यटकका लागि आकर्षणको केन्द्र बनेको छ । यो पदमार्ग हलेसी तुवाचुङ नगरपालिका–७ मा अवस्थीत छ । कङ्क्रिट प्रयोग नगरी यस किरात ऐतिहासिकस्थल तुवाचुङ जायजुङमा चुनासुकीको पर्खाल निर्माण गरी पदमार्ग बनाइएको छ जसको लम्बाइ सात सय ३० मिटर लामो रहेको छ ।
यो
पदमार्गको निर्माण संस्कृति, पर्यटन तथा नागरिक उड्डयन मन्त्रालयको लगानीमा भएको हो । हलेसी
तुवाचुङ नगरपालिकाले यस पदमार्गलाई ‘तुवाचुङ मिनी ग्रेटवाल’ नामकरण गरेको छ । तुवाचुङ–जायजङमा किरात समुदायको
सभ्यताको उद्गमस्थल मानिन्छ । याहाँ मिनी ग्रेटवाल नामको पदमार्ग निर्माण गरिएपछी
यो स्थान सुन्दर बन्दै गएको छ ।
यो
पदमार्ग समुन्द्री सतहदेखि एक हजार आठ सय मिटर उचाइमा रहेको छ । भौगोलिक हिसाबले पनि
तुवाचुङ–जायजुम आकर्षक
रहेको छ । यहाँबाट हरेक बिहान बेलुका सूर्योदय र सूर्यास्तको दृश्य देख्न सकिन्छ ।
मौसम सफा
भएर आकाश खुलेका दिन याहाँबाट उत्तरतिर पर्ने विश्वको सर्वोच्च शिखर सगरमाथाका
साथै उच्च हिमाली शृङ्खलाहरु टलक्क चाँदी झैँ टल्किएको देख्न सकिन्छ । यस ऐतिहासिक
एवं पर्यटकीय स्थललाई याहाँ निर्माणाधीन मिनी ग्रेटवालले थप आकर्षक बनाएको छ ।
