भदौ २०, काठमाडौँ । डोल्पा जिल्लाको डोल्पोबुद्ध गाउँपालिका-६ फालगाउँमा अवस्थित रहेको 'कुन्ख्येन फालक' ताल तिलिचोभन्दा बढी उचाइमा रहेको दाबी गरिएको छ।
गाउँपालिकाका जनप्रतिनिधिहरूले ताल निरीक्षण गरेपछि कुन्ख्येन फालक ताल सबैभन्दा अग्लो स्थानमा रहेको दाबी गरेका हुन्। डोल्पाका प्रमुख जिल्ला अधिकारी भूमिश्वर पोखरेललाई उनीहरूले तालको नापजाँच गर्न आग्रह गरेका छन्।
ताल ५ हजार १९० मिटर उचाइमा रहेको जिपिएस ट्र्याकरबाट नाप्दा पाइएको गाउँपालिका उपाध्यक्ष पेमा धोर्चे गुरूङले बताएका छन । त्यसपछि उनीहरूले प्रशासनलाई उक्त ताल नेपालकै अग्लो स्थानमा रहेको र यसको नापजाँचका लागि भनेका हुन्।
हाल समुद्री सतहबाट नेपालकै सबैभन्दा अग्लो स्थानमा रहेको तिलिचो ताल ४ हजार ९१९ मिटर माथि छ। उपाध्यक्ष गुरूङले कुन्ख्येन फालक तिलिचोभन्दा २७१ मिटर बढी अग्लो स्थानमा रहेको बताएका छन।
- न्युज बहार संवाददाता
