भदौ ३, भरतपुर । उत्कृष्ट पर्यटकीय गन्तव्यमध्येको एक हो चितवनको जलविरे झरना । चितवनको इच्छाकामना गाउँपालिका–६ जलविरेमा अवस्थित यस झरनामा पुग्ने पर्यटकले शीतलताको छुट्टै आनन्द महसुस गर्ने गर्दछन । पूर्वाधारहरुको निर्माणपछि पर्यटकको चहलपहल बढेको पनि उक्त झरनामा बढेको छ ।
यस झरना क्षेत्रमा झरनाको अवलोकन सहित अन्य पर्यटकीय गतिविधिहरु जस्तै क्यानोनिङ (छाँगावरोहण) र क्लाइम्बिङ, स्लाइडिङ, स्विमिङ, हाइकिङ र जम्पिङ हुने गरेका छन । यस्ता पर्यटकीय गतिविधिहरुका लागी काठमाडौँ र बाहिरी देशका समेत पर्यटक यहाँ आउने गरेका छन् । विदेशीका लागि क्यानोनिङ प्रतिव्यक्ति रु पाँच सय, वनभोजको रु एक हजारदेखि तीन हजारसम्म र फिल्म सुटिङको रु तीन हजारदेखि पाँच हजारसम्म लिने गरिएको छ ।
जलविरे झरना अहिले गाउँपालिकाका लागि आम्दानीको स्रोतसमेत बनेको छ । आर्थिक वर्ष २०७९-८० मा झरना देखाएर गाउँपालिकाले रु २८ लाख ३५ हजार राजस्व सङ्कलन गरेको छ । यहाँ आउने पर्यटकबाट रु ५० शुल्क लिने गरिएको छ । गाउँपालिकाले स्थानीय र विद्यार्थीलाई भने प्रवेश शुल्क रु २० लिने गरेको जनाएको छ ।
- न्युज बहार संवाददाता
