मंसिर २०, बागलुङ । गण्डकी प्रदेशको स्थानीय उत्पादनको बजारीकरण र पर्यटन प्रवर्द्धनका लागी आगामी पुस ११ देखि २१ गतेसम्म बागलुङ उद्योग वाणिज्य सङ्घको आयोजनामा बागलुङ महोत्सव हुने भएको छ ।
सङ्घका अध्यक्ष नरेश कँडेलले पछिल्लो समय बागलुङको व्यापार सुस्ताउँदै गएकाले बजारलाई चलायमान बनाउने उद्देश्यले महोत्सव आयोजना गर्ने निर्णय भएको जानकारी दिएका हुन ।
कँडेलका अनुसार महोत्सवमा तिनमा स्थानीय वस्तु तथा सेवाको प्रदर्शनीका लागी घरेलु तथा कृषि उत्पादन, हस्तकलाका सामग्री, जडीबुटीका साथै अन्य बस्तुहरुको एक सय २० भन्दा बढी प्रदर्शनी कक्ष रहने छ ।
महोत्सवका क्रममा नृत्य, पुरुष भलिबल प्रतियोगिता, दोहोरीलगायत प्रतियोगिताहरु पनि आयोजना हुनेछन् । यस वर्षको बागलुङ महोत्सवको नारा ‘पर्यटन, कृषि, कला संस्कृति, उद्योग र व्यापार समुन्नत बागलुङ निर्माणको आधार’ रहने छ ।
- न्युज बहार संवाददाता
