फागुन २०, काठमाडौँ । निर्वाचन आयोगले प्रतिनिधि सभा सदस्य निर्वाचनका लागि आवश्यक सबै तयारी पूरा भएको जनाएको छ । बुधबार आयोजित पत्रकार भेटघाट कार्यक्रममा कार्यवाहक प्रमुख निर्वाचन आयुक्त रामप्रसाद भण्डारी ले देशभरका मतदान केन्द्रहरूमा आवश्यक सामग्री सुरक्षित रूपमा पु¥याइसकिएको जानकारी दिए ।

उनका अनुसार २०८२ साल भदौ २३ र २४ गते भएको आन्दोलनपछिको विशेष परिस्थितिमा घोषणा गरिएको यो निर्वाचनलाई स्वच्छ, निष्पक्ष, पारदर्शी र विश्वासयोग्य बनाउन आयोग सक्रियतापूर्वक लागिपरेको छ । फागुन २१ गते बिहान ७ बजेदेखि साँझ ५ बजेसम्म देशभर मतदान सञ्चालन हुने तय भएको उनले बताए ।

मतपत्र, मतपेटिका लगायत सबै आवश्यक सामग्री सम्बन्धित केन्द्रहरूमा पुर्‍याइएको र मतदान स्थलहरूको निर्माण तथा व्यवस्थापन सम्पन्न भइसकेको जानकारी पनि उनले दिए । साथै, मतदान केन्द्रहरूलाई लैंगिक तथा अपाङ्गमैत्री बनाउँदै सबै मतदाताले सहज रूपमा मतदान गर्न सक्ने व्यवस्था मिलाइएको उनले स्पष्ट पारे ।

• न्युज बहार संवाददाता