फागुन २४, काठमाडौँ  । प्रधानमन्त्री पुष्पकमल दाहाल प्रचण्डसँग उपप्रधान तथा गृहमन्त्री रवि लामिछानेको नियुक्तबारे नेपाली कांग्रेसले जवाफको माग गरेको छ । आज बिहीबार बसेको प्रतिनिधिसभा बैठकमा बोल्दै कांग्रेस संसदीय दलका प्रमुख सचेतक रमेश लेखकले अनुसन्धानको दायरामा रहेका मन्त्रीबारे प्रधानमन्त्रीले जवाफ दिनुपर्ने भन्दै प्रशन गरेका हुन् । 

यस विषयमा उनले भने, ‘कुनै पनि ठाउँबाट कुनै पनि किसिमको अनुसन्धानको दायराभित्र नियुक्त भएर आउनुभएका मन्त्रीहरू नपरेका होलान् भन्ने आशा गरेको छु, यदि परेका छन् भने प्रधानमन्त्रीले त्यसपछि सदन के हुन्छ भन्ने कुराको जवाफ पनि दिँदा राम्रो हुन्छ भन्ने मेरो आग्रह छ ।’

गृहमन्त्री तथा राष्ट्रिय स्वतन्त्र पार्टीका सभापति समेत रहेका लामिछानेमाथि अहिले राहदानी दुरुपयोगमा सर्वोच्च अदालतको संवैधानिक इजलासमा रहेको मुद्दा विचाराधीन अवस्थामा छ भने प्रहरीको केन्द्रीय अनुसन्धान ब्युरोले सहकारी ठगीको आरोपमा उनीमाथी पनि अनुसन्धान गरिरहेको छ । अर्को तर्फ लामिछानेविरुद्ध प्रधानमन्त्री कार्यालय मातहत रहेको सम्पत्ति शुद्धीकरण विभागले पनि सम्पत्ति शुद्धीकरणमा समेत छानबिन गरिरहेको छ। 

• न्युज बहार संवाददाता