फागुन १९, काठमाडौं । पशुपति क्षेत्रमा अतिक्रमित
भएका संरचना हटाउन काठमाडौं महानगरपालिकाले २४ घण्टे अल्टिमेटम दिएको छ । महानगरपालिकाको महानगर प्रहरी टोली
सहितको टोलीले पशुपति क्षेत्रमा भएको अतिक्रमित संरचनाको निरीक्षण गरेपछि २४
घण्टाभित्र त्यस्ता संरचना हटाउन निर्देशन दिएको हो ।
पशुपति क्षेत्र विकास कोषबाट एक
रोपनी जग्गा वार्षिक ५० हजार भाडामा लिएर १० रोपनी जग्गा गौशाला धर्मशाला नाममा
सञ्चालन भइरहेको महानगरका एक कर्मचारीले बताएका छन ।
यस्तै २० वटा भन्दा धेरै सटरहरु पशुपति
क्षेत्रमा विना दर्ता सञ्चालन भइरहेको महानगरले गरेको निरीक्षणमा भेटिएको छ ।
धर्मशालाहरुले नक्सा पास विना नै संरचना निर्माण गरेको समेत पाएकोले त्यस्तो
संरचना समेत हटाउने समय दिएको महानगरका एक अधिकारीले जानकारी दिएका छन ।
पशुपति
क्षेत्र विकास कोष र महानगर दुवैलाई थाहा नदिई अवैध रुपमा निर्माण भएका संरचना, सम्झौता विपरीतका व्यवसायहरु, अतिक्रमित संरचना हटाउन बुधबार कोषले
महानगरलाई एक पत्र लेख्दै अनुरोध गरेको थियो । सोही अनुसार महानगरले अनुगमन गर्दै
२४ घण्टाभित्र त्यस्ता संरचना हटाउन निर्देशन दिएको हो ।
- न्युज बहार संवाददाता
