बैशाख ३१, काठमाडौँ । पशुपति आर्यघाटस्थित विद्युतीय शवदाह गृहमा दाहसंस्कारका लागि ल्याइने शवलाई निःशुल्क शवदाहको व्यवस्था गर्ने पशुपति क्षेत्र विकास कोषले जनाएको छ।
कोष सञ्चालक परिषद्को संस्कृति, पर्यटन तथा नागरिक उडडयन मन्त्रालयमा बसेको बैठकले थप चार विद्युतीय शवदाह गृहको व्यवस्था गरी निःशुल्क दाहसंस्कारको व्यवस्था गर्ने निर्णय गरेको कोषका सदस्य सचिव डा मिलनकुमार थापाले जानकारी दिएका छन ।
उनले भने “कोषले कार्यविधि निर्माण गरेपछि कोष सञ्चालक परिषद्ले उक्त कार्यविधि पारित गर्ने छ । यसका लागि केही समय लाग्ने छ”, ।
अहिले पशुपतिमा रहेका दुई वटा विद्युतीय शवदाह गृहमध्ये एउटाको यन्त्र बिग्रिएको छ भने हाल एउटा शवदाह गृह मात्र सञ्चालनमा रहेको सदस्य सचिव थापाले बताएका छन।
पशुपति आर्यघाटमा अहिले दाउराबाट जलाएर शवको दाहसंस्कार गरेबापत रु १५ हजार र विद्युतीय शवदाह गृहमा रु चार हजार शुल्क तोकिएको छ ।
- न्युज बहार संवाददाता
