असोज ९, काठमाडौँ । २१ असोजदेखि दशैं, तिहार र छठ पर्वलाई लक्षित गरेर सरकारले सहुलियतपूर्ण पसल सञ्चालन गर्ने भएको छ । उद्योग, वाणिज्य तथा आपूर्ति मन्त्रालयमा आज मंगलबार बसेको बैठकले सहुलियतपूर्ण पसल सञ्चालन गर्ने निर्णय गरेको हो।
मन्त्रालयका सहसचिव एवम् प्रवक्ता गजेन्द्र ठाकुरले भने, ‘२१ असोजदेखि दशैं, तिहार र छठ पर्वका लागि सहुलियतपूर्ण पसल सञ्चालन गर्ने निर्णय भएको छ, सहुलियतपूर्ण पसलमा उपभोक्ताले ५० रुपैयाँसम्म छुट पाउन सक्ने छन।’
सहुलियतपूर्ण पसल मंसिर ३ गते सम्म सञ्चालन हुने छ भने मन्त्रालयले यस पसलमा २२ प्रकारका उपभोग्य वस्तुमा छुट पाइने जनाएको छ ।
साल्ट ट्रेडिङ, खाद्य व्यवस्था तथा व्यापार कम्पनी र दुग्ध विकास संस्थान गरी तीन वटा निकायले ९८ स्थानमा सहुलियतपूर्ण पसल सञ्चालनमा ल्याउने मन्त्रालयले उल्लेख गरेको छ ।
- न्युज बहार संवाददाता
