जेठ २, काठमाडौँ। आईपीएल - इन्डियन प्रिमियर लिगमा साविक विजेता समेत रहेको गुजरात टाइटन्सले हिजो राती भएको खेलमा सनराइजर्स हैदरावादलाई ३४ रनले पराजित गरेको छ । हिजोको यस जितपछि प्लेअफमा पुग्ने गुजरात पहिलो टिम बनेको छ। गुजरातले एक खेल बाँकी छँदै प्लेअफमा आफ्नो स्थान पक्का गरेको हो ।

१३ खेलबाट १८ अंक जोडेको गुजरात अंक तालिकाको शीर्ष स्थानमा रहेको छ । गुजरात शीर्ष दुईमा रहने पक्का भइसकेको छ र सिधै क्वालिफायर खेल्ने भएको छ। गुजरातले अब लिगको बाँकी खेलमा बेंगलोरसँग खेल्ने छ।

हिजो आठौं हार बेहोरेको हैदरावाद भने लिग चरणबाट बाहिरिएको छ। लिग चरणबाट बाहिरिने हैदरावाद दोस्रो टिम बनेको छ । नरेन्द्र मोदी स्टेडियम घरेलु मैदानमा टस हारेर पहिले ब्याटिङ गरेको गुजरातले ९ विकेट गुमाएर १८८ रन बनाएको थियो भने १८९ रनको लक्ष्य पछ्याएको हैदरावादले निर्धारित २० ओभरमा ९ विकेट गुमाएर १५४ रन मात्र बनाउन सफल भयो।

• न्युज बहार संवाददाता